International Press Institute (IPI) ja MIDAS almmuheaba odne, cuoŋománu 12. beaivve, vuosttaš ohcanbaji NewsSpectrum Fellowship -stipeanddaide.
Stipeanda lea oaivvilduvvon journalisttaide ja eará media ámmátolbmuide geat barget unnitlohkogielalaš mediain EU:s (maiddái romána- ja sisafárrejeaddjigielalaččaide) ja dan ulbmil lea movttiidahttit unnitlohko- ja eanetlohkogielalaš ođasdoaimmahusaid ovttasbargui.
NewsSpectrum áigu ruhtadit 40 stipeandda jagi 2021 guokte fidnu bokte: Collaborative Reporting Fellowships ja Professional Placement Fellowships.
Stipeandašlájat ja áigemearit
Collaborative Reporting Fellowship doarju unnitlohkomediain bargi journalisttaid (maiddái jeavddalaččat bargi friddja doaimmaheddjiid) raporterenprošeavttaid mat dahkkojit ovttasbarggus eanetlohkogielat journalisttain dahje medialágádusain.
Raporterenprošeakta sáhttá vuodjut masa beare almmolaččat beroštahtti fáddái mii lea mávssolaš goabbáge mediaorganisašuvnna publikummii. Goittotge prioriteret prošeavttaid mat deattuhit EU:a iešguđetge unnitlohkojoavkkuid dili dahje perspektiivva dahje unnitlohko- ja eanetlohkojoavkkuid gaskavuođaid. Prošeavttat mat lasihit eurohpálaš áššiid birra raporterema unnitlohkomediain leat bures boahtimat. Stipeandda sáhttá ohcat buotlágan raporterema várás ja ságaid sáhttá almmustahttit man beare hámis. Digitála/audiovisuála muitalanteknihkat leat bures boahtimat. Ságaid galgá almmustahttit sihke unnitlohku- ja eanetlohkogielat mediain.
Collaborative Reporting Fellowships -ohcamušaid ohcanáigemearri lea miessemánu 28. beaivi 2021. Lassin mii ráhpat guokte lasseohcama geassemánus ja borgemánus. Gávnnat buot dieđuid ja dávjá jerrojuvvon gažaldagaid dáppe.
Professional Placement Fellowship doarju unnitlohkogielat mediaámmátolbmuid heivehuvvon oanehis áiggi ámmáthárjehallamiid dahje oahppogalledemiid eanetlohkogielat mediaide. Stipeanda lea oaivvilduvvon buot medialágádusbargiide, omd. journalisttaide, doaimmaheddjiide, govvajournalisttaide, ođaslanja vástideaddjiide, sosiála media vástideaddjiide, searvvušvástideddjiide dahje digitála innovašuvnnain bargi olbmuide. Maiddái jeavddalaččat bargi friddja doaimmaheaddjit sáhttet ohcat. Dan sáhttá geavahit ovttasbargandáidduid ja iešguđetge ođasdoaimmaheami beliide, omd. ođasdoaimmaheapmái, fitnodatdoaibmamálliide, publikumma oassálastimii ja searvvušhuksemii laktáseaddji dieđulonuheami doarjumii.
Professional Placement Fellowships ohcanáigi álgá odne, cuoŋománu 12. beaivve, ja bistá miessemánu 28. beaivvi 2021 rádjái. Professional Placement Fellowshipa várás lea plánejuvvon dušše okta ohcanbadji. Gávnnat buot dieđuid ja dávjá jerrojuvvon gažaldagaid dáppe.
Gelbbolašvuohta ja ohcandetáljat
Unnitlohkogielat media ámmátolbmot sáhttet ohcat stipeandda juos sin medialágádus lea EUs dahje Stuorra-Británnias ja dat buvttada unnimusat 51% iežas sisdoaluin guvllolaš dahje unnitlohkogillii (dasa gullet maiddái sisafárrejeaddjigielat ja románagielat). Loga dáppe lasi dan birra mat gielat dohkkejit. Eanetlohkogielat raporterenguoibmi dahje isitorganisašuvdna galgá maiddái leat EUs dahje Stuorra-Británnias. Rájáid rasttildeaddji ovttasbarggut leat bures boahtimat.
Mii ávžžuhit áinnas čađahit hárjehallama báikki alde, go NewsSpectruma mihttomearri lea hukset suvdilis guoibmivuođaid unnitlohko- ja eanetlohkogielat mediaid gaskii. Dát guoská erenoamážit Professional Placement Fellowshipii. Goittotge COVID-19-pandemiija geažil mii váldit vuhtii maiddái gáiddusmolssaeavttuid, juos doaimmaid sáhttá goittotge čađahit beaktilit.
Oppalaččat guktot hárjehallamat galggašedje bistit unnimusat guokte vahku, muhto soddjilis hárjehallanáiggit leat vejolaččat. Hárjehallamiid sáhttá čađahit goas beare geassemánu ja juovlamánu 31. beaivvi 2021 gaskkas.
Sihke unnitlohkogielat mediahárjehalli ja eanetlohkogielat raporterenguoibmi dahje -isit sáhttiba goappašge ohcat eanemusat 6000 € juohke hárjehallamii. Stipeanda sáhttá gokčat unnitlohkogielat hárjehalli bálkágoluid (buhtaduvvojit njuolga bargoaddái) sihke báikki alde šaddi goluid (omd. idjadan- ja boradangoluid). Mátkegoluid buhtadit daid lassin. Eanetlohkogielat mediai stipeanda sáhttá maiddái gokčat bálkágoluid sihke mátkegoluid, juos lea dárbu. Jagi 2021 NewsSpectrum vuordá fállat oktiibuot 480,000 € hárjehallanstipeandan.
Beroštuvvan media ámmátolbmuid ávžžuhit lohkat dievaslaš válddahallama, gelbbolašvuohta- ja válljenkritearaid sihke ohcanrávvagiid NewsSpectruma neahttasiidduin. Ohcamušaid galgá dahkat eŋgelasgillii. Ohcciid ávžžuhit nannosit sihkkarastit alcces raporterenguoimmi dahje isitorganisašuvnna ovdal ohcama. NewsSpectrum prošeaktaguoimmit leat goittotge gergosat geahččalit gávdnat ohcciide heivvolaš isitorganisašuvnnaid juos dasa lea dárbu.
Hárjehalliid vállje válljenkommišuvdna, man vihtta lahtu leat sorjjasmeahttun áššedovdit. Prográmma lea čatnasan suddjet nannosit buot stipeandaoažžuid journalisttalaš sorjjasmeahttunvuođa.
Duogáš
NewsSpectrum lea International Press Institute (IPI) ja European Association of Daily Newspapers in Minority and Regional Languages (MIDAS) oktasaš álgga. European Roma Institute for Arts and Culture (ERIAC) lea doarjjalahttu.
NewsSpectrum lea ođđa prográmma man ulbmil lea movttiidahttit bargogaskavuođaid unnitlohkogielat mediaid, maiddái sisafárrejeaddjigielat mediaid, sihke eanetlohkogielat mediaid gaskkas miehtá EU:a. NewsSpectrum-stipeanddat vigget buoridit daid guokte joavkku gaskasaš ovttasbarggu ja doarjut unnitlohkogielat media suvdilvuođa Eurohpá uniovnna friddja ja pluralisttalaš mediabirrasa dehálaš lahttun. Dat vigget maiddái doarjut mediafuomášumi masa gullá áššedovdi raporteren unnitloguide guoski áššiid birra, ja doallat ođasraporteremis mielde unnitlohkojoavkkuid ovddasteaddjiid oainnuid.
NewsSpectrum-pilohttaprográmma ruhtada Eurohpa kommišuvdna (DG Connect) ja dat oažžu lassedoarjaga ERIACis. Dasa lassin ođđa ovttasbargoguoimmit almmuhuvvojit dađe mielde go dat sihkkarasttojit.
Gažaldagat?
Mii ávžžuhit beroštuvvan ohcciid fitnat vuos lohkamin lassedieđuid ohcama birra NewsSpectruma neahttasiidduin ja min dávjá jerrojuvvon gažaldagaid siiddus. Juos dus leat ain gažaldagat, váldde áinnas oktavuođa minguin.
Oktavuohtadieđut
Josh LaPorte (IPI): [email protected]
Anna-Kira Pirhofer (MIDAS): [email protected]
Čuovo varrasamos ođđasiid! Diŋgo NewsSpectruma ođasreivve.
The NewsSpectrum programme is co-funded by the European Commission within the framework of the pilot project “Internship opportunities for Minority Language Media”, with additional financial support from ERIAC. Further partnerships will be announced as they are confirmed.
(Photo by Finn Hackshaw on Unsplash)