L International Press Institute (IPI) y MIDAS fej al savëi che da ncuei, 12 de auril, ie davierta la prima perioda per fé dumanda per l stipendium NewsSpectrum Fellowship.
L stipendium ie pensà per jurnalisć/jurnalistes y d’autri prufesciunisć/d’autra prufesciunistes tl ciamp di media che lëura per media dla rujenedes de mendranza tl’UE (tlo toca leprò nce la rujenedes rom y di migranc) y à l fin de ncurajé la cunlaurazion danter l’agenzies de stampa dla rujenedes de mendranza y chëles dla rujenedes de maiuranza.
NewsSpectrum se à tëut dant de finanzië 40 stipendium tl 2021 tres doi programs: i Collaborative Reporting Fellowships y i Professional Placement Fellowships.
Tipologies de stipendium y termins
L program Collaborative Reporting Fellowship sustën proiec de reportage purtei ora da jurnalisć/jurnalistes che lëura per i media dla rujenedes de mendranza (tlo toca leprò nce i/la culaburadëures liedies reguleres) n cunlaurazion cun jurnalisć/jurnalistes o n’urganisazion jurnalistica de na rujeneda de maiuranza.
L proiet de reportage possa se cunzentré sun uni argumënt de nteres generel de mpurtanza per l publicum de tramedoi urganisazions jurnalistiches. Purempò ti uniral data la preferënza ai proiec che auza ora la situazion spezifica o l pont de ududa dla grupes de mendranza tl’UE o che trata la relazions danter la grupes de mendranza y de maiuranza. L ie bënudui i proiec che juda pea a curì cuestions europeiches ti media dla rujenedes de mendranza. Uni sort de reportage ie lasceda pro y la stories possa unì publichedes te uni format. L possa unì adurvedes nce tecniches de cunteda digitela/audiovisuela. N se aspieta che la stories vënie publichedes sibe dai media tla rujenedes de mendranza che nce da chëi tla rujenedes de maiuranza.
L ultimo termin per fé dumanda per l Collaborative Reporting Fellowships ie ai 28 de mei dl 2021. L ie ududes dant doi periodes sëuraprò per fé dumanda per chësc program, bonamënter de juni y de agost. Tlo pudëis udëi duta la informazions y la FAQs.
L program Professional Placement Fellowship sustën practicum ndividuei cun na dureda curta o sujurnanzes da pert di prufesciunisć/dla prufesciunistes di media dla rujenedes de mendranza pra i media dla rujenedes de maiuranza. L stipendium ie daviert a duc i culaburadëures y a duta la culaburadëures dl’urganisazions jurnalistiches, danter l auter jurnalisć/jurnalistes, editëures, fotojurnalisć/fotojurnalistes, newsroom manager, social media manager, community manager o culaburadëures che se cruzia dla inuvazion digitela. Nce culaburadëures liedies reguleres ie lascei/lascedes pro. Chësc stipendium possa unì adurvà per slargë ora la cumpetënzes tl ciamp dla cunlaurazion y per se giamië ora cunescënzes sun aspec defrënc dla redazion de nutizies, danter l auter l reporting dla nutizies, la transizion digitela, i modiei de business, co tré ite l publicum y co fé su na community.
La dumandes per l Professional Placement Fellowship unirà cunscidredes a rotazion a scumencé da ncuei, 12 de auril, nchin ai 28 de mei dl 2021. Al mumënt iel ududa dant mé una na perioda per fé dumanda per l Professional Placement Fellowship. Tlo pudëis udëi duta la informazions y la FAQs.
Recuisic y details per fé dumanda
I prufesciunisć y la prufesciunistes tl ciamp di media dla rujenedes de mendranza possa fé dumanda per l stipendium sce si urganisazion jurnalistica à si sënta tl’UE o tl Rëni Unì y produj almanco l 51% de si cuntenuc te na rujeneda regiunela o de mendranza (tlo toca leprò nce la rujenedes di migranc y di rom). Tlo pudëis liejer de plu sun ciuna rujenedes che ie lascedes pro. Nce l partner de reportage o l’urganisazion che dà albierch dla rujeneda de maiuranza muessa avëi si sënta tl’UE o tl Rëni Unì. Culaburazions sëura i cunfins ora ie ududes de bon uedl.
L vën cunsià de fé i practicum sun l post, a una cun l fin de NewsSpectrum de mëter a jì culaburazions che dura danter i media dla rujenedes de mendranza y chëi dla rujenedes de maiuranza. Chësc vel dantaldut per l Professional Placement Fellowship. Per gauja dla pandemia da COVID-19 possa nce unì cunscidredes opzions a destanza, a cundizion che l’ativiteies posse unì purtedes inant cun suzes.
De regula dura tramedoi programs almanco doi enes, ma l ie nce mesun fé ora na na dureda plu flessibla. I programs possa unì realisei te uni mumënt danter juni y l 31 de dezëmber dl 2021.
Sibe l praticant/la praticanta di media dla rujenedes de mendranza che l partner de reportage o l’urganisazion che dà albierch dla rujeneda de maiuranza possa se damandé nchin a 6.000€ per uni stipendium. Per l praticant/la praticanta dla rujeneda de mendranza possa l sustëni finanzier curì la spëises de paiamënt dla paga (che vën paiedes zeruch diretamënter al datëur de lëur) y nce n stipendium per la spëises sun l post (p.ej. albierch y proviant). La spëises de viac unirà curides sëuraprò. Per i media dla rujenedes de maiuranza possa l sustëni finanzier curì la spëises de paiamënt dla paga y la spëises de viac, sce les ie senificatives. De ndut se aspieta NewsSpectrum de dé ora 480.000€ de sustënies per i stipendium tl 2021.
Per fé dumanda dëssa i prufesciunisć y la prufesciunistes di media nteressei liejer duta la descrizion, i recuisic, i criters de selezion y la istruzions sun la plata web de NewsSpectrum. La dumandes muessa unì mandedes ite per nglëisc. L ti vën cumetù a chi che fej dumanda de se seguré n partner de reportage o n’urganisazion che ti dà albierch dan dé ite la dumanda. Sce l ie de bujën ie i partner dl proiet NewsSpectrum a despusizion per purvé a cunlië chi che fej dumanda y à de bona premisses cun n’urganisazion che dà albierch adateda.
L unirà cris ora chi che possa tò pert al program da n cumité de selezion de cin cumëmbri metuda adum nce da esperc ndependënc. L program se mpënia a stravardé a puntin la ndependënza editoriela de duc chëi che tol pert.
Chi che ie do l proiet
NewsSpectrum ie na scumenciadiva cunlieda dl International Press Institute (IPI) y dl European Association of Daily Newspapers in Minority and Regional Languages (MIDAS). L European Roma Institute for Arts and Culture (ERIAC) ie n partner de sustëni.
NewsSpectrum ie n program nuef pensà per ti dé na sburdla ala cunlaurazion danter i media dla rujenedes de mendranza, danter chisc nce i media dla rujenedes di migranc, y i media dla rujenedes de maiuranza tl’UE. I stipendium NewsSpectrum à l fin de miuré la cooperazion danter la doi grupes y sustenì i media dla rujenedes de mendranza sciche cumëmbri de mpurtanza te na cuntreda liedia y pluralistica di media tl’Union Europeica. N cëla nce de ti judé ai media che nfurmea cun savëi sun la cuestions dla mendranzes y che tol ite l pont de ududa di reprejentanc dla grupes de mendranza tl reporting dla nutizies.
L program NewsSpectrum vën co-finanzià sciche proiet pilot dala Cumiscion Europeica (DG Connect), cun n sustëni finanziel sëuraprò da ERIAC. Autri partner unirà fac al savëi pernanche i unirà cunfermei.
Mo dumandes?
Ti cunsion a chi che ie nteressà a fé dumanda de vijité la plata web NewsSpectrum y nosta plata FAQ sun co fé dumanda. Sce ëis mo vel’ dumanda sëuraprò, pudëis sambën nes cuntaté.
Cuntac
Josh LaPorte (IPI): jlaporte@ipi.media
Anna-Kira Pirhofer (MIDAS): anna-kira.pirhofer@eurac.edu
No ve perdëde l’ultima nuviteies! Scrijëve ite ala newsletter NewsSpectrum.
The NewsSpectrum programme is co-funded by the European Commission within the framework of the pilot project “Internship opportunities for Minority Language Media”, with additional financial support from ERIAC. Further partnerships will be announced as they are confirmed.
(Photo by Finn Hackshaw on Unsplash)